Hawti zo lâta puapa

Zisu ku ta chahnao awpa ta hawtipa nah avaw chhipa ta ama y no kha ta, A pachupazy ta ama ra khawh. Zisu deikua chata a hmô nata aly leipa ta, "Hawti chyhtapa zy ei hnohta avaw chhi u la, dytha kha u; Khazohpa Khinarâh cha he hawhpa chyhsa zy eih châ tlôh ta" tah ta. He bie vâ heta khiahma, pitlohpa achareipakhyna liata hawti nah thata ama pôhpakhy tly! tahpa ei pachâ tyh.

Chareipakhyna liata pitlohpa lâhpa cha, Bethesda ti âchatlaopa lâta dive hmâ leipa Zisu ta a patlâh hapa chadi ta chadipa kha lyu ei ta, Davi ta Sawla chariah chhaichhi âtobi ta, âpiepâ thai khao leipa hawta â i ei ta, Faktea ta a nâ papaopa nah nata phie phie ama lyu.  Hawti lâhpa nah deikua cha Paima beat khiah, Pikhai beat khiah patla thai khai ei ta, pahneihpâ laihpa ta ama lâh khiah eima pahnei pachhi ta, hmeiseih kawpa ta ama zlâ khiah eima pahnei a pachhi via. 

Achareipakhypa tlyma fellowship tlyma, pitlohpa programme liata hawtipa zo lâta puapa deikua he la pha vei. KHP member palôhpathai sia kawpa nah amâ rao pathaona su a châ. Siaha vaihto liata pitlohpa nah he paôpazypa tao khai rô pi ta, eima hâ amâ kaw la pathao tua chaina cha, chareipakhy lâta ama pua pathao tawh hih vâduachhih kawpa ta a châ. Viasazy nah ta â vaw hmô pakhy ei ta, châhnamei pazy beih leipa zy châta ama eikha pazyna châta daihti rypaohpa vaw châ ta, vaw pazy hmâ hapa nahzy châta pakhu rai lei ta ahi amâ chuna daihti a châ tyh. 

Nôpaw thokha la, KHP hyutuhpa nahta ama saw nah krismas-kôthiehpa chareipakhyna tawhta tlyma, crusade chareipakhyna tawhta tlyma ama vaw padisa nata, hiehâh paphôh thai kawpa eima y tyh. "Achareipakhyna chhôh liata sai ama y cha ma" eima tah thei aw, pazô buakha ta ama kaw sâhpâ ta pipyu kaw sy para, zâ ngia para heih tah ta ypa ama hluh kaw. Ngia thlâh ha na ta, thyutliapa y pha khoh leipa nah hih KHP member ama châ nota zo lâ chareipakhy tiama chaipa nah ama châ lymâ! "Châhnamei pazy paru cha khâ ma a pei na, a kaw pitloh tita a pazy awpa pasaih thlâh pyly pi ta" eima tah thei aw! Nôpaw pasai leipa ta aruta lâta hmo ama tao pathaopa kha hmo peipa cha a châ via. 

School lia hlâta KHP members nah hry liata viasa pha leipa amâ huapa hih a pei via. School liata la discipline vâta school hawti nah ama kohki pahnie via. KHP members zo lâta puapa nah la kohkitupa y vei ei. Zo lâta âchadaipa âchâh chhuahpa zy, chareipakhy awpa ta pua achhuahpa zy he Nôpaw nata KHP Chhithatuhpazy ta eima pakhâ awpa a peimawh kaw. Hawtipa nahzy he Nôpaw alyna châ hra ei sala hawti pha leipa la nôpaw châta kô hluhpi pachârôhna ama châ tyh. Kaw pitloh' ei ta, school ama vaw bâh tua chai aw. Chatawhta paritheipa hmo liata vaw tlaitlao ei ta, ama cha vaw "chhâ" tita la, na palôh pasa kaw hra sala yzie hnei khao' vei; a hawh haw aw.

Mongyuh nah zy Viah nah zy Maw nah zy la ama saw nah zo lâta papuasa pasaih tiarâh vei ei; ama khiliah âboh lei hleikhô ta hawtipa laiseih nawpa châta daihti pha leipa a châ tahpa ama pahnopa vâta. Keimo Mara Nôpaw nah la châ ma pi, eima thlah zy lôh kaw chu! Hawti sâlâpa zy, hawti tata chyhsa khâsaw ta reih lei zy, â thlachhie rai leipa ta nata âchieh kawpa ta hlâta uthei viapa nata viasa "chhâpa" zy ama hluh bâ dâh la e! Keimo Marasaw la hawti mohôhna kyh liata eimâ nai chypa vâta thata eimâ pachu via awpa a byuh kaw.

Biesozy 6:22 liata cha, "Hawtipa a sie nawpa lâpi liana cha ta pachu la, a machâ ti chhao ta siesai/siechhei aw vei" tahpa eima hmô. Zô puapa nata zo lâta chareipakhypa he ama siena awpa lâpi châ vei. Chavâta pitlohpazy ta maophaohna lai kawpa eima hnei, Eima saw nata nawhta nahzy lâpi dopa lâta chhihtha awpa hih. KHP Chhihthatuhpazy nata MTP Chhihthatuhpazy, ra eima vaw hlaopâ hapa chhao ta Zisu pachupazy hawhta, hawtipa zo lâta pua ta palaopalâpa la dytha ta, tlâ padisa awpa he eima kâchhie khah ei su.