Heih Sala

Heih sala!


 Chasipaw vaw châ ta, khodâh hawh hlâta vaw chasi via ta, eima kuphei hmiazy vaw châ ta, pua a vaw kai ha heih nah ta la, ei Pâ reisa ta, number 2 hawh nohsa a aihpâ ta “nopi kaw châ bâ heih sa la i ?”, tah tyh pi ta. Cha hawh pyly ta nopi noh ta chhao eima mathlai roh a kaw tôpâ ha nata la chasipaw eima vâ thlyu heih tyh. He pakhopâna hru kawpa heta daihti ta chyhsapa eima hmo khopa athla ngâthlâh ha na tahpa a palâpasiasa kawpa ta ei pahno. Hmo eima pachâpazy chhao daihti reizie ta â thla lymâ tyh hra.
 
Ata kô Christmas vaw tlô heih awpa lia chhao heta eima hmo pachâpa nata khopa âlyu tlâ heih awpa ta pangiasa âchhih vei. Hawti nahzy ta chysia thiehpa thata haw heih ei ta, Christmas Mapaw ta present a vaw cheipa awpa chhochhi amâ ngiatiah lei kaw heih thlyu aw. Christmas heta eima tha a papawhsa kaw na tah thei awpa ta, eima laihsa nahzy bazaar liata ama hmia thlaohmiah hawhta pawhpa, ama hmao hmiahkhuthei tihâh saihpanyuh kawpa hawhta saihpa ta, ama chhôhkha leipa tluapa hawhta chavei-chachâh athata âheihhâ tyh ei ta, satlia nahzy chhao ama ‘christmas with you’ awpa tluapa ta, chava liata thodaw lopa, adaihti ta liata pathei tyhpa ama reipa hawhta, laihsa chareina lâ adaihti ta liata phie amâ thao khai heih tyh hra aw! Viasa vâro tlai eima hmô khao leipa nahzy, Christrmas thlihpi pathlipa chata, âlypa nata thapha ngaitapa ta maniah pahmôsa heih tyh ta, chhôhkhazy chhao âki kawpa nata âdyryh kawpa ta maniah pa-ysa heih tyh hra.

Eima hawti via nota dawrâh daopa khohdaih leipa ta barah liata christmas mahpaw present eima dao tyhpa zy, kyhchhina liata lachâhna liata lôhraoh kawpa ta christmas laotlo eima bawh khoh tyhpa zy nata eima laohmô pua eima pachhao pâ ngâ nataih ta, “a sasapa”, eima awsao tyhpa zy kha, tahmâ ei za pachâpakhua nata, kha daihti no hlâta christmas rônah viapa hropa rai a y nata pangiasa va na. Christmas ei ngiatiah lei chai nachhâpa a châ hra. Zâ ta nôpaw pasaileina chôta puapa ta “bu” sa pi ta, ârie pakhypa eimâ chhuah tyhpa zy, eima tovyuh chyu thochiah nata chhohna raohpa âhua pakhypa ta meipaoh eimâ aih tyhpa zy nata eimâ di heih ti ta eima nô-paw ta sômahsi chhaota maniah amâ vaw byh aw tahpa riah chipâ thlâh nachô ta, azo ta tâkuhnyupa eimâ châ tyhpa zy kha ta na, keila Christmas eima vaw tlô heih awpa zy he eina pavâsa via pachaih tyh.

Christmas daihti ahnia via eima tha pawh via tahpa nata eima hmotaopa lia maihta eimâ ly kaw tyhpa pachâna  kha keima liata mai-ih hna hawhta hro ngâthlâh ha sala ei kho kaw. Moh reihpa chita eima viasa sahlaota  Aolainô Meithei thochhia â chabapa ta eimâ dyuh tyhpa zy, Ready 1, Ready 2, Ready 3 tahpa nata achaki lâ tawhta âchadina dawh, âmoparuna dawh, etc tahpa ao eima thei pataw nata Rambo hawhta eima lu liata Japansihna ta Sikh Luhbyuhpa nah hawhta phie eima chaty-pahlôh khai ha tyhpa zy, hiakha lâta eima viasa nah ta, “ei na risk chi, khataih lia ei y, na hai saita chyhsa risk khao khâ”, tahpa ta amâ vaw eipâ tyhpa zy ei mothlawpa liata ngâlâh châh bâh ta, lôhlie â chhi kaw. Aw! Aw pakua theipa châ mawh sala, aw!     


  Daihti eima patu thaileipa heta Christmas ei vâ kaw tyhna chhâpa chhao khôkhei lymâ ta, ei palôhrupa chhao athla ngâthlâh ha hra. Halpuah(chhâhna Bawm), rawket nata Bazaar Bawmzy ama vaw khâh rakha tawhta kôh chareih ta Christmas ziza adia via lymâpa ta pahno na ta, keima liata Christmas ei vâ( kaw tyhna)na chhâpa zy chhao tahmâ la reih awpa a sôh kaw bâ.  Daihti ta ei hmokhopazy thla ta, ei pachânazy a khôkhei lymâ ngâ kaw tarawpa ta, christmas vâ n’awpa chhâpa sâkha chhâ hela, he daihti rarôh-y kawpa heta â vaw pahiehkhei ha heih sala ei tah kaw tyh.