Ei paloh

EI PALÔH


A chheipâh eima kei tlô dyu tawhta a rohta miah charao pathao ta, noh no nata zâ no daihmâ tlai Viah nah ie roh eima chahâ cha la,India liata ie-o seih chaipa liata ei khitly byuhna zydua phie a pai. Viahna ie roh chhie dâh rimâ kha la aw! iahpâ hiahpâ thaopâ thupâ a tah.



Alei theileipa vâ nata eimâ parahpa vâta North East Train Delhi-Guwahati cha eima unawh pathôh ta patu pi ta, chanô châ ei ta, tlao am tao thei ei tah kaw. Oxygen zy â vaw paihpâ ei sala cha a rainao kawta eima sie awpa, cha hawhpa tao tlâ hra veih ei. Sikhar nata Dilbag ta na tlao amâ vaw ready via.

Mydi dawh 7 tawhta Anand Vihar tawhta sie pathao pi ta, eima kiah pataw nata palo pathao ta, dawh 10 a kaw tloh kha la, ti zy a sahta sah ha bâ ta, vivih âtlao ta na ei pahno. Waiting ta eima sie hnaita, toilet kiapâh lia atyuna paryh pi ta, a palopa chhao pachawparawpâ ta la Delhi lie khophie a châ thlyu aw.

UP lia eimâ râ kha pyhlie nata ochhi tawhta thlihua nai zualuapa vaw pathlipa kha a thupâ, iehua thu hualuapa vaw pathlipa nahta miakha. Viah nah ie pazô sâh awpa ta kaw pua ei ta, miah ama veithlupâ tyh chhochhi, Châdua ta a lahpinô chhôhpapuahpa chao liata chhâhmeih kua ahnaopa hawhta ama chao papo khai h’awpa na eina byuh!.

Attendant ta a pohty a sona cupboard nata atyuna cha eimâ mô nawpa ta chalei cheingei awpa byuh ta, athao nota Rs 400 a tah kha, eima peimawh tahpa pahno thlâh hra ta, Rs 500 tah kache heih ta, phusa a khohpa hmi chhao ie roh hryh liata la a nepte.

Cupboard lia cha amô’n ta, ribyh he lyu ta, tapôh thlachhâ na ta, riethei tah rai leita mydi taih ei mô thlâh hra kha la ânano chaimâh. Mydi ei kaw thyu kha la, ei hu achhâ khiah ma tah na ta, ei hu chatlie kache ta so parah na ta, iehua thu hualuapa ta ahmô pareipâ ha ma châ tly! Nungo kei moh na ta, a vaw reih chamaohpâ chu!

Ama ie roh sensational kawpa hry tawhta “Ahytlyma” hmia khochhih kawpa rai âlâ thei vei. Ie roh zy chhao he avaw hluh thei kaw he tlyma tahpa ei pahno papuapâ.

Vâsâ ta UP cha za khô pi ta, Bihar zâ ngia heih pi ta, Patna liata Viahna zâ ngiapa nah ie roh chhao âthlahpâ hra ta: a roh athaota thao ha ta, miah a charaona dâh chhao miah apangei khai . Mydi ta New Jalpaiguri(NJP) tlô thlâh ha awpa eimâ châpa tlai kha(seat a rua awpa vâta), dawh charie chhôh delay pâlao heih ei ta, ei kahraopa kha tlao kaokha lâta la ei lykhei kaw.

Indo-Gangetic Plains liata âhlao hrapa vâta ma a châ’ tly, West Bengal eimâ ngiapa kha la, vâ chhao vaw suah hra ta, ama râh chhao ahroh pha kaw hra. Km 24 kawhpa, Chicken Neck Corridor ama tah tyhpa, Siliguri tawhta kha la o eimâ hnia ha tahpa thei awpa tlai na a vaw châ: Northeast ziza chahâ pathao daihmâ hapa eima châpa vâ.

Zâlâ 2:30 rachhôh ta New Jalpaijuri cha tlô pi ta, Ticket Taker ta seat maih a pie kha la, NuEmilyn nata Nungo chhao khotalai kawpa ta ama vei âmâ vei chhiechhu nasa hra. Eima hmia mopa ta eimâ ly tahpa âhno thlâh ha ta, okhaih tawhta raithlih ti deikua la loh hraoh vei.

Train liata cha zâ mô pathao lymâ bâ hra pi ta, eima lôhrâ chhao atlô sahlao sai hra. Viah nah ie-roh thei awpa y khao va, station to liata ama ie roh chhao âthla lymâ khao hra va, a tah kha la, keimo châta la lôhrâtlôna khi tlai na a châ. Guwahati eimâ ngiapa chhao hmah âthei hmâ ma pi.

Flight ta sie thei thlâh ha awpa la ei châ taraw hra, deikua la train ta sie thomo awpa khona pathipalôh hnei hra tlôh na ta, riethei chhao âpapeisa leipa ta, ie-roh to chahâ laih lymâna chôta Guwahati eima tlôpa cha ei lyna âki mâh to vei!

Achhâpa la, Guwahati liata ei Palòh ay leipa vâta! Ei Palôh cha he khihpi tawhta lâhla leipa liata y ta, hmô, hria, vei hmâ lei awpa ei châpa ta ei tha eina pachhie chai mâh.

Ei palôh liata ei Palôh cha khâ âthei ngâthlâh ha na ta, ei palòh liata ei Palôh ngâlâh y ta, ei Palôh ngâlâh na ei palôh liata a y hra. Zâlâ nohtlana taihta âpakyh cha rei lei, a kiah lia buakha chhâ chhao hmahta daihti ei hmâh hmâ leipa cha palôh-y âchhih tah hleikhôta reih pasia thai va na.

Mawsi, Kâna râh ângia awpa Beipa ta apasaih leipa, Abari tlâh tawhta Kâna râh a sai nota a palôh- yzie, tlô hra awpa apahlazie nata ei palôh cha ei pakhopâ via chai. Guwahati chhao Assam khihpi lâi kawpa, peimawh kawpa hawhta hmô thei khao va na; Abari tlâh hawhta dei lei.Israel saw nah Kâna tlôkhei awpa kha âchhuah chaipa châ ta, keichhao Shillong ângia hrawpa cha ei chhuah chaipa châ hra ta, deikua la Hiavâ ta âryh A tah leipa châ bao tlyh!

Hy! Abari tlâh,
Lòh-yna tlâh;
Maw, chho, nochhi, notla
Aheina ri maih,
Mawsi lôh pa-ytuhpa;
Tlô lei'pa ta ma eina pakhâ hraw chi?
Hy! Abari Tlâh y!

tahpa ta vivih ei sa.

Eima râh la eima sie chhôh zydua ta ei palôh cha, kheihti nata sâhpiti ta alo thlupa, ei Palôh liata ngâlâh y ta, dusaw dusaw ta ei Palôh nata cha âhla via lymâ pi ta, ei Palôh cha khatita ma ei palôh nahta âmâ tyh heih aw vâ!